Biantara dina Raraga Paturay Tineung

Assalamu’alaikum Wr Wb

Alhamdulillahirobbil’alamin. Wabihi nastainu ala umuridunya wadin waala alihi washobihi ajmain ama badu. Robbi Sohri Sodri wayasirli amri wahlul ukhdatan minlisani yafqohul qauli.

Hadirin anu sami-sami linggih,

Puji sinareng syukur urang sami-sami sanggakeun ka hadirat Allah SWT, anu parantos ngamparkeun ni’mat ka urang sadayana. Insya Allah ni’mat Islam, ni’mat Iman, sareng ni’mat silaturahmi, dugi ka urang sadayana tiasa patepung lawung paamprok jonghok dina ieu acara. Kalihna ti eta teu hilap mugia shalawat miwah salam kawilujengan mugia ginuluran ka junjunan urang sadayana Kangjeng Nabi Muhammad SAW, ka kulawargana, ka para sohabatna tug leleberanana gubrag ka urang sadaya nu umangken umatna. Mugi ieu acara téh lungsur langsar kalayan kahontal sagala anu dipimaksad. Amin.

Bapa pupuhu anu ku sim kuring dipihormat, Bapa Ibu Guru anu ku sim kuring dipihormat, Jajaran Tata Usaha miwah Staf anu ku sim kuring dipihormat, Paratamu miwah Parasepuh sadaya nu ku sim kuring dipihormat, teu hilap kanggo rerencangan sadayana nu ku sim kuring dipikacinta.

Sim kuring ngadeg di ieu tempat minangka wawakil ti rerencangan kelas tilu, hoyong cumarios ngedalkeun kareteg angan. Saleresna sim kuring dina danget ieu payuneun parasepuh miwah paratamu anu sami rawuh, taya sanes seja ngiring jabung tumalampung sabda kumapalang.

Kitu oge bari jeung digedeng ku kendang gede pakauman, dag-gig-dug rasaning ati, rumasa sim kuring mah taya kabisa, sanggem paripaos tea mah etang-etang lauk buruk milu mijah. Boa catur ge nu tanpa bukur, ngalantur teu puguh alang ujurna taya pulunganeunana.

Bapa kalih Ibu, hadirin hormateun sim kuring. 

Mungguh ari waktu asa nyeak pisan sajorelat. Asa kamari keneh sim kuring saparakanca munggaran lebet ka ieu sakola teh, ayeuna teu karaos sim kuring saparakanca tos kedah paturay deui. Sim kuring saparakanca kedah miang deui neraskeun sakola, kanggo ngahontal harepan sareng cita-cita.

Sim kuring saparkanca sadar, kantenan wae salami tilu taun diajar di ieu sakola, seueur pisan anu bakal janten panineungan. Di dieu, di sakola ieu urang nu genah pikabetaheun, sim kuring saparakanca diajar neangan elmu salami tilu taun. Ruang riung boh di kelas boh dina rupa-rupa kagiatan bari jeung sakapeung sempal guyon gogonjakan sareng rerencangan. Tangtos eta sadayana bakal janten panineungan nu moal kahihilapkeun dugi ka iraha bae oge. Atuh kasaean Bapa kalih Ibu Guru sadaya, elmu pangaweruhna anu didugikeun ka sim kuring saparakanca Insya Allah tangtos bakal nyerep dina angen, janten obor nu bakal nyaangan jalan sorangeun. Pamugi elmu nu katampi sing dijantenkeun mangpaat nu luar biasa kanggo sim kuring saparakanca.
Saterasna pirang-pirang kasaean Bapa kalih Ibu Guru sadayana, sim kuring saparakanca teu tiasa males eta kasaean, mung tiasa ngedalkeun du’a, pamugi rupining elmu sareng katiasa anu parantos dipaparinkeun, kenging ganjaran anu mangtikel-tikel ti Gusti Nu Maha Suci. Amin.

Bapa Pupuhu Sakola kalebet sadaya rengrengan, salami sim kuring saparakanca diajar di ieu sakola tangtosna seueur pisan kalepatan, seueur pisan paripolah sareng sikep anu tangtosna tiasa janten ngajaheutkeun manah ka sadayana. Jalaran kitu, sim kuring ngawakilan rerencangan sadayana, dina danget ieu neda sih hapuntenna, mugi Bapak miwah Ibu sadayana jembar hapuntenna kana samudaya kalelepatan sareng kaluluputan boh nu dihaja atanapi nu teu kahaja.

Pamungkas, sim kuring neda pidua ti sadayana, pamugi sim kuring saparakanca nu parantos lulus dina  taun ieu sing tiasa neraskeun tolabul elmu. Dipaparin kasalamaten sareng kani’matan dina ngahontal cita-cita. Lungsur-langsar teu aya halangan-harungan, nyukcruk elmu di tingkat nu langkung luhur.

Rupina mung sakitu nu kapihatur. Amit mungkur. Hapunten sakali deui, bilih aya basa anu kirang merenah, kecap nu kirang larap, bilih aya kalimah nu teu raos sumarambah kana manah sareng matak nyelekit kana ati. Mugi agung cukup lumur jembar panghampuntenna.

Wabillahi taufik wal hidayah. Wassalamu’alaikum Wr. Wb